Оптимизам за Македонија пристигна од германскиот Бундестаг. Со давањето на поддршка за Македонија во октомври да добие пристапни преговори за членство во Европската Унија, поранешниот амбасадор во Берлин, Ѓорги Филипов, смета дека одлуката може позитивно да влијае и на преостанатите земји. Филипов за „Слободен печат“ позитивно го оценува германското ДА за Македонија во ЕУ.

– Одлуката е супер. Претпоставувам дека ќе биде датумот определен. Претпоставувам дека сè е договорено и со останатите земји, иако се уште има некакви резерви како Холандија, Данска… Сметам дека ќе биде доделен датумот во октомври – изјави за „Слободен печат“ поранешниот амбасадор во Берлин, Ѓорги Филипов.

Одлуката на Бундестагот, според него, може позитивно да влијае на другите земји.

– Може само да придонесат, дека Бундестагот има детално проценето, анализирано… Не се работи само за емоција, туку се анализи што е направено, што треба да се направи и тие кажуваат. Така што сметам дека само ќе влијае позитивно на одлуката на другите земји. Мислам можеби нешто ќе напоменат, меѓутоа на крај сите едногласно ќе дадат препорака – вели Филипов.

Бундестагот вчера на Македонија ѝ даде зелено светло за пристапни преговори за ЕУ со 476 гласа „за“, 122 „против“ и 16 воздржани пратеници. Пратениците во исто време гласаа и за почеток на преговорите на Албанија .