Министерството за здравство на Бугарија испрати остар допис до производителот на вакцини „АстраЗенека“, објави бугарската приватна телевизија НОВА која го има документот, јави дописникот на МИА од Софија.

Во документот се наведува дека во моментот постои сериозно доцнење во снабдување со вакцини од компанијата. Како пример, Бугарија на 1 март ќе добие, веројатно, само 52.000 дози од вакцината, иако според планот треба преку 142.000.

Бугарскиот министер за здравство на Бугарија, Костадин Ангелов инсистира „АстраЗенека“ итно да испрати 52.000 дози од лекот во Бугарија уште утре, додавајќи дека земјата е подготвена да обезбеди воздушен транспорт за оваа цел.

Во писмото се наведува и дека масовната вакцинација во Бугарија се движи со многу високо темпо, а со недостигот на вакцини, „АстраЗенека“ „ја одзема надежта на луѓето”.

Бугарија денеска постави рекорд по бројот на вакцинирани луѓе за еден ден. Од 7:30 до 17:30 часот по локално време се вакцинирани 18.900 бугарски државјани.