Врачанскиот митрополит Григориј ја отслужи велигденската литургија на Воскресението Христово во Патријаршиската црква „Свети Александар Невски” во Софија.

Како што јави дописникот на МИА од Софија, првпат по осум години откако патријархот Неофит е на чело на Бугарската православна црква, тој не ја води велигденската служба на најголемиот христијански празник – Велигден.

Причината за тоа е здравствената состојба на патријархот Неофит. Митрополитот Григориј објасни дека „за среќа, состојбата на Неговата Светост не е многу сериозна и вознемирувачка” и со својот благослов ги поздрави верниците со Христовото Воскресение од патријаршискиот храм.

На празничната служба присуствуваше претседателката на Националното собрание Ива Рупчева.

Патријархот Неофит и митрополитите на Светиот синод на Бугарската православна црква – Бугарската патријаршија испратија велигденска порака.

Во пораката се вели дека „вознемирувачки е што и денес, два милениуми по Христовото Воскресение и сите други спасувачки настани од светата историја, светот во кој живееме продолжува да се распаѓа од неправди и противречности, од војни и секакви манифестации на омраза и насилство од човек на човек. Светот во кој живееме продолжува да биде болен, свет на страсти и гревови, кој страда од човечката мрзеливост во големото Богочовечко дело на спасението – свет во кој вечните евангелиски вредности и небесните богатства, кои Христос ни советува да ги собираме, се повеќе се изместени од огромната себичност и егоцентризам, од желбата за поседување и грабање, кои веќе не ги загрозуваат само нашите морални основи, туку и самиот живот на земјата во која опстојуваме”.