Бугарскиот град кој процвета од најголемата измама со социјалната помош во Британија

Бугарски измамници од Британија / Фото Британско обвинителство

Најголемата измама со социјалната помош во Британија е откриена откако бугарски полицаец им рекол на британските власти дека неговиот град одеднаш бил преплавен со готовина и дека криминалците „живееле како барони“, откри британски Телеграф.

Петмина бугарски државјани признаа дека украле повеќе од 50 милиони фунти од британските даночни обврзници во април и се појавија на првиот ден од нивното тридневно сослушување пред судот во Вуд Грин Краун во вторникот.

Галина Николова (38), Стојан Стојанов (27), Цветка Тодорова (52), Ѓунеш Али (33) и Патриција Панева (26) уживаа поддршка од десетици членови на семејството и пријатели. Во април тие се изјаснија за виновни за измама и перење пари.

Групата имаше илјадници „клиенти“ и во пораките споделени на Вотсап се шегуваше со неможноста на Министерството за труд и пензии да ги фати.

Нивната шема беше разоткриена кога Васил Панајотов, инспектор од бугарскиот град Сливен, започна истрага за ненадеен прилив на пари во неговиот град, откако забележа дека се градат недвижности, а жителите носат дизајнерска облека.

Тој откри дека илјадници луѓе, од кои многумина никогаш не ја посетиле Британија, добиваат до 2.500 фунти месечно од островот. Тој ги предупреди властите преку британската амбасада во Софија и во мај 2021 година беа извршени серија рации низ северен Лондон.

„Првиот пат ми стана сомнителен кога го видов протокот на пари во Сливен. Се прашував како овие луѓе добија толку многу пари. Добив информации од контакти дека стотици луѓе добиваат социјални бенефиции од Обединетото Кралство искористувајќи ги слабостите на Британскиот систем кога ја добив оваа информација, ја започнав мојата сопствена истрага, на крајот зборував за можеби 200 милиони фунти годишен приход од ОК“, рече Панајотов, продолжувајќи:

„Парите кои влегуваа во Сливен го трансформираа градот. Луѓето купуваа дизајнерска облека и недвижен имот, отвораа продавници и казина. Ги дадов информациите на британската полиција и тие започнаа сопствена истрага за бандата“.

Измама со Универзалниот кредит

Обвинителот Том Литл изјави пред судот во вторникот дека во моментов се водат истраги во Британија против голем број други лица осомничени за вмешаност.

Опишувајќи го обемот на измамата, тој рече: „Злосторството вклучуваше многу илјади лажни тврдења за универзални кредити кои беа поднесени до Министерството за труд и исплатени. И покрај обемот, шемата за измама беше едноставна за извршување и многу ефикасна“.

Универзалниот кредит беше воведен постепено од 2013 година наваму за да се насочат претходните бенефиции како што се детски даночен кредит, станбен надоместок и паричен надоместок, и обично се дава на луѓе со ниски примања или на невработени.

Литл му кажа на судот дека биле поднесени лажни тврдења за да се добие Универзален кредит со помош на вистински луѓе кои „речиси секогаш биле Бугари“ и кои „биле соучесници и имале финансиска корист“.

„Тврдењата беа поткрепени со серија фалсификувани документи и лаги. Фалсификуваните документи вклучуваа фиктивни договори за закуп, фалсификувани ливчиња и фалсификувани писма од сопственици, работодавци, училишта и општи лекари“, објасни Литл.

Тој вели дека поголемиот дел од апликантите живееле во Бугарија и поднеле апликации лажно тврдејќи дека живееле и работеле во Британија.

„Многумина патуваа овде за кратко време за да го поднесат своето барање пред да се вратат во Бугарија. Некои никогаш не ни патувале овде“, тврди Литл.

Главни архитекти на измамата биле, се дознава на суд, Али и Николова. Бандата започнала со наоѓање „клиенти“ во Бугарија, чии лични податоци би можеле да ги искористат за лажно да се преправаат дека живеат и работат во Британија.

Тие потоа изготвиле серија фалсификувани документи, вклучувајќи фиктивни договори за закуп, фалсификувани ливчиња и фалсификувани писма од сопственици, работодавци и општи лекари.

Литл рече дека групата организирала и стотици евтини летови за лажните баратели да патуваат во Британија и да присуствуваат на интервјуа или да се фотографираат со докажување дека се во земјата и имаат право на бенефиции. На група на Вотсап беа разменети пораки и фотографии, исмејувајќи ја наивноста на британските институции.

Министерството понекогаш бара фотографии од луѓе надвор од домовите со отворени влезни врати за да докаже дека живеат таму. Групата би фотографирала лажен апликант надвор од адресата и потоа ја фотошопирала фотографијата за вратата да изгледа подотворена.

Градот целосно сменет

Сливен некогаш беше просперитетен индустриски град познат по својата текстилна индустрија, но неодамна беше во опаѓање. На периферијата биле изградени големи гета, а многу фабрики во овој бугарски град пропаднале.

Во последниве години, градот стана познат и како извор на млади девојки кои се продаваат во секс индустријата.

Говорејќи ексклузивно за Телеграф од расипаните канцеларии на единицата за организиран криминал во Сливен пред изрекувањето на пресудата, 47-годишниот Панајотов рече дека верува оти бандата заработувала до 200 милиони фунти годишно.

Откако ќе се доделат привилегиите, тврди Панајотов, „клиентите“ ќе треба да платат еднократна провизија од 500 до 800 фунти, по што ќе добиваат во просек од 2.000 до 2.500 фунти месечно.

„Нашата истрага откри неколку илјади луѓе, клиенти на оваа шема, и веројатно многумина сè уште добиваат пари преку слични шеми. Николова имала најмалку 5.000 до 6.000 клиенти, а Али управувал слична програма на слично ниво“, вели Панајотов.

Британски Телеграф дознава дека бандата им дозволила на клиентите да добиваат бенефиции два месеци, по што почнале да ги пренасочуваат парите на свои сметки. Од тој момент, тие ги зеле сите пари за себе и за „доверителите“ кои помогнале да се најдат соодветни кандидати во Сливен.

Инспекторот Панајотов вели дека малиот бугарски град бил „променет“ со пари и многу клиенти „живееле како барони“.

Најголем дел од клиентите, како и доверителите доаѓаат од ромската заедница. Кога британскиот медиум ги посети ромските области во градот Сливен, се чинеше дека многу куќи се претворени во големи вили.

„Во моментов во Сливен има 30 казина. Овие казина најчесто ги граделе криминалци кои имаат многу пари. Измамниците лесно заработуваат пари и ги трошат парите брзо, без никаков план. Живеат како барони“, објасни Панајотов.

Али побегнал од Британија во Бугарија, но бил екстрадиран на 25 февруари минатата година за да се соочи со правдата. Судот слушна дека Тодорова и Николова, исто така, неуспешно се обиделе да побегнат од Британија по нивното прво апсење во мај 2021 година. Во Обединетото Кралство, сите пет обвинети, освен Тодорова, живееле околу областа Вуд Грин во северен Лондон.

По советот на Панајотов, Министерството за труд и пензии спроведе сопствена истрага пред да започне серија рации.

Детективите пронајдоа 750.000 фунти во готовина, како и големо количество дизајнерска облека, накит и часовници во станот на Стојанова и Николова. Меѓу нив имало два часовници Емпорио Армани, два Версаче, чевли Гучи и бројни патики Шанел. На домашната адреса на Али се пронајдени повеќе од 40.000 фунти во готовина, како и бројни фотографии од банкноти, прстен Тифани и слика од него со голема количина пари.

Панајотов рече дека не може да разбере како се одвивала измамата толку долго без да забележат британските власти: „На почетокот британските претставници во амбасадата рекоа дека тоа не е можно. Дури и нашиот директор беше изненаден од обемот“.

Панајотов вели дека по апсењето на измамниците бил поканет на роденденската прослава на покојната кралица во британската амбасада во Софија. „Сега многу луѓе во Сливен ме мразат“, додаде бугарскиот инспектор.

Одделот за работа и пензии објави дека неговите иследници работеле на следење и фаќање на измамниците, собирајќи опширни докази за лажни договори за закуп и компании кои се создадени за издавање лажни потврди за вработување. Групата создала и многу лажни лични документи.

Случајот е опишан како комплексен со големо количество разузнавачки информации што треба да се анализираат и да се обезбедат полициски ресурси пред да се изврши апсење. Министерството во најбрз можен рок ги прекина плаќањата, откако беа собрани доволно докази.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот