Бугарскиот премиер Бојко Борисов симболично го означи стартот на работата на првата делница од автопатот „Европа“.

Oваа делница ќе ја поврзе Софија со граничниот премин Калотина на границата со Србија и натаму со Ниш и Белград, јавуваат бугарските медиуми.

Како што пренесуваат медиумите, Борисов вчера свечено ја отворил работата за модернизација на стариот пат Калотина-Софија на делницата „I-8“ помеѓу Драгоман и Сливница.

„Првата фаза опфаќа 17 км од Драгоман до Сливница. На таа делница ќе биде изградена втора лента од автопатот, а старата ќе биде реконструирана, па така оваа сообраќајница ќе се прошири и ќе стане автопат“, се наведува во информацијата.

Инвестицијата изнесува 117,3  милиони лева (околу 60 милиони евра), а средствата се обезбедени од државниот буџет.

Делницата од автопатот „Европа“ помеѓу Калотина и софиската обиколница е долга 48 км и е поделена на три дела: Калотина-Драгоман, Драгоман-Сливница и Сливница-Северната обиколница.

Втората лента од автопатот на делницата Драгоман-Сливница би требало да биде завршена до крајот на 2020 година, изјави премиерот Борисов, додавајќи дека српскиот дел од автопатот „Европа“, од бугарската граница до Ниш е готов.