27.8 C
Скопје

Бугарија: Членка на ЕУ или мала копија на Путинова Русија?

Доколку ниту еден голем бизнис и ниту еден голем медиум во Бугарија не може да опстои ако не е покровител на власта, тоа не е земја членка на ЕУ, туку смалена копија на Путинова Русија.

Да се „изгребе“ ГЕРБ од власта не е исто како да се избришат вулгарни натписи од нечија фасада. Дури и идниот премиер да не знае да игра бељот со некој од најбогатите бизнисмени, дури и да одбива подароци во форма на златни шипки, системот повторно ќе преживее – освен ако не биде урнат.

Во Бугарија секогаш било полесно да се стигне до некого „од горе“, отколку да се следат правилата. А со ГЕРБ и Борисов, овој модел беше утврден речиси како единствен што функционира. Со санкции од „високо место“ се решаваат сите спорови и проблеми – за бизнис територии, со царините, даночните и регулаторни комисии, агенциите. Дури и сместувањето во одредена болница за време на пандемијата.

 Мала копија на Путин

Кога една држава ќе стане позната под името на тој што ја раководи, тоа е повеќе смалена копија на Путинова Русија, одошто земја членка на Европската Унија. Моделот е ист – контролиран бизнис, подредени медиуми, послушно Обвинителство. Преку Црното Море, џудо-партнерите на претседателот растат и се богатат, а тука се луѓе од друштвото за бељот. И тука и таму, лидерот е постојано на телевизија. И тука и таму, Обвинителството е чувар пред портите на автократијата. И тука и таму, Владата ја изгуби способноста за дијалог со неистомислениците.

Бугарија е како малата кукла матрошка, што излегува од внатрешноста на големата. И се чини дека само еден чекор ја дели од тоа целосно да заличи на неа – моделот на Владата, коментиран од руската амбасадорка Митрофанова на следниов начин: „Вие сте парламентарна република, тоа е прилично сложена форма, можеби е најлогична за богатите земји со одржливи механизми и партиски системи“.

Дали тоа значи дека логичен облик на влада за Бугарија, неизговорен од Митрофанова, е претседателска република?

Разбравме, исто така, дека „сојузничката солидарност“ (според Митрофанова), што произлегува од членството на Бугарија во ЕУ и НАТО, ја попречува добрата соработка со Русија. Меѓутоа, во основата на тие два сојуза се демократските вредности кои еродираа во матрошките – солидарност, владеење на правото, еднаквост пред законот, медиумски плурализам, толеранција, граѓанско учество.

Бугарскиот пример

Ќе биде тешко да се „изгребе“ моделот што е толку погоден за интересите на силите туѓи на евроатлантизмот. Сепак, успехот ќе биде чекор напред и ќе ги охрабри другите во ЕУ. На пример, во Унгарија, каде што владеењето на правото е сериозно нарушено од владеењето на Виктор Орбан. Но, дури и Унгарија, каде што независните медиуми се затвораат еден по друг, е рангирана на 92-то место на Репортери без граници. Додека ситуацијата во Бугарија е вистинско свлечиште со години, а земјата дојде до срамната 112-та позиција. Најголемите ТВ станици сè уште ги прекинуваат своите програми со цел да ги пренесуваат оригиналните видеа на премиерот во оставка Бојко Борисов.

Враќањето на владеењето на правото и демократијата во Бугарија значи многу повеќе од „бришење“ на ГЕРБ – тоа гарантира задржување на земјата во орбитата избрана во 1997 година со декларацијата за членство во ЕУ и НАТО. Ова е и тест за идната влада и фундамент на платформа за управување. Алтернативата е по Борисов да имаме „колективен Борисов“.

 

Преземено од „Дојче веле“

Поврзани вести

Курц: Северна Македонија сработи одлично на патот на евроинтеграциите

Слободен печат

Европската унија со економски санкции против Белорусија

Слободен печат

Вулин: Да им се забрани влез во Србија на оние кои гласаа за Резолуцијата за геноцид во Сребреница

Катерина Стевовска

ФОТО | Вистинско уживање! Се кандисавме за Охрид, бендисавме и топло препорачуваме: Кај Маја и Душица на домашни специјалитети од кои ќе ви се отворат сите чакри

Јасмина Кантарџиева Димков

Главен научник на СЗО: Разочарува резултатот на вакцината „КјурВак“

Слободен печат

ВИДЕО | Вознемирувачка ситуација: Мечка влегла во град во Јапонија, четири лица се повредени

Слободен печат

Остави Коментар