Ако барате идеја за брз, хранлив и вкусен ручек, овие тортиљи со пилешко месо, печурки и свеж зеленчук се одличен избор. Подготовката трае околу 20 минути, а резултатот е богат оброк инспириран од мексиканската кујна, пишува „Пун куфер“.

Тортиљите може да ги наполните со различни состојки, но комбинацијата од сочно пилешко месо, грав, пченка и освежителен прелив од грчки јогурт е вистински погодок.

Состојки

За тортиљите:

– 4 тортиљи

– 2 пилешки гради

– 250 грама шампињони

– 400 грама конзервиран црвен или црн грав

– 200 грама конзервирана пченка

– 2 домати

– 1 свежа краставица

– 1 главица црвен кромид

– 1 мала зелена салата

– 50 грама чедар сирење или друг рендан кашкавал

– маслиново масло

– 2 лажици соја сос

– 1 лажичка оригано

За преливот:

– 180 грама грчки јогурт

– 1 чешне лук

– 1 лажица маслиново масло

– 1 лажичка чадена пиперка

– сол и бибер по вкус

Подготовка

Исечете го пилешкото месо на коцки, зачинете го со оригано, маслиново масло и соја сос, па оставете го кратко да се маринира.

Во меѓувреме, исчистете ги и преполовете ги шампињоните. Исечкајте ги доматите, краставицата и кромидот, а зелената салата измијте ја и исушете ја. Исцедете ги гравот и пченката.

За преливот, измешајте ги грчкиот јогурт, маслиновото масло, чадената пиперка и ситно сечканиот или издробен лук. Посолете, забиберете и добро промешајте.

На загреана тава пржете го пилешкото месо околу пет минути со постојано мешање. Извадете го, а потоа на истата тава испечете ги шампињоните. Измешајте ги со месото.

Кратко загрејте ги тортиљите на сува тава.

На секоја тортиља ставете листови зелена салата, грав, пченка, пилешко месо со шампињони, рендано сирење, кромид, домати и краставица. Прелијте со јогурт-преливот, завиткајте и послужете.

Овој оброк е идеален за брз ручек, вечера или оброк што лесно може да го понесете со себе.