Бројот на починати од коронавирусот во САД премина 100.000 за помалку од четири месеци, што е најмногу во светот, а 1,69 милиони заразени во земјата претставуваат околу 30 отсто од глобално инфицираните, се наведува во новите податоци.

Првиот случај на зараза во САД е регистриран во Вашингтон на 21 јануари.

Вкупниот број на починати во САД е 100.276 соопшти Универзитетот „Џонс Хопкинс“ во Мериленд, кој води евиденција за пандемијата.

Дописникот на Би-Би-Си јави дека тоа е речиси исто како бројот на американски војници кои починале во Кореја, Виетнам, Ирак и Авганистан за време на претходните 44 години.

Според бројот на починати во однос на бројот на жители, САД се на деветта позиција, позади земјите како Белгија, Велика Британија, Франција и Ирска, наведува Универзитетот.

Во светот се забележани 5,6 милиони случаи на зараза со коронавирусот, а починати се 354.983 луѓе.