Премиерката на Србија, Ана Брнабиќ изјавила дека компромисно решение е единственото можно решение за косовското прашање, со кое и едната и другата страна би добиле стабилност, среќна иднина, долгорочен мир и просперитет.

Брнабиќ за Блиц рекла дека решението на косовскиот проблем мора да подразбира она што претседателот Александар Вучиќ секогаш го нагласува, а тоа е двете страни да изгубат, но и да добијат нешто.

– Односно, да добиеме најмногу што можеме, а да изгубиме најмалку што мораме, рекла премиерката.

Таа потсетува дека Вучиќ, кога повеќето во Србија подржувале замрзнат конфликт за Косово и Метохија, имал политичка храброст да го подигне прашањето за договор помеѓу Србите и Албанците.

– Тоа беше тешка, непопуларна, но во исто време и една исправна и одговорна одлука. Со тоа се покажува грижа за генерациите кои доаѓаат, бидејќи постои една опасност која замрзнатиот конфликт ја носи со себе, а тоа е дека во некој момент ќе се одмрзне. За жал, многу време и можности пропуштивме да го решиме ова прашање. Денеска заради тоа се наоѓаме во многу потешка ситуација, од што беше пред 10 или 15 години, вели Брнабиќ.