Делта сојот на коронавирусот е поголема загриженост за Обединетото кралство отколку новооткриениот омикрон сој, смета Крис Вити, водечкиот британски епидемиолог.

Како што вели епидемиологот, владата на Борис Џонсон беше во право кога се одлучи за построги мерки, како што е суспензија на патувањата од шест африкански земји, со цел да се забави доаѓањето на новата варијанта во Велика Британија.

Меѓутоа, Вити предупредува дека секој обид за наметнување построги ограничувања може да наиде на противење на јавноста и сугерира дека загриженоста треба повеќе да се фокусира кон актуелната закана – делта сојот на коронавирусот.

Тој, исто така, нагласува дека новата варијанта не значи судниот ден, односно дека повеќе го загрижува опасноста што ја претставуваат постоечките варијанти на вирусот, нагласувајќи дека епидемијата на делтата сојот е главната работа што треба да не загрижува до Божиќ, пренесува Телеграф.

-Знаевме дека одвреме-навреме ќе се појават нови варијанти, но има многу што не знаеме и шпекулациите веројатно не се многу корисни, рече професор Вити на вчерашна панел дискусијата.

Џон Бел, еден од најистакнатите владини советници за вакцини и лидер на тимот што ја разви вакцината АстраЗенека, на панелот кажа дека новиот омикрон сој може да предизвика само течење на носот и главоболки кај оние кои биле вакцинирани.

-Иако новата варијанта можеби ќе може да избегне антитела, помала е веројатноста да избега од Т-клетките и другите делови од имунолошкиот систем кои обезбедуваат поширока заштита, рече тој.

Светската здравствена организација вчера и го додели грчкиот збор Омикрон на новоидентификуваната варијанта на коронавирусот, што се појави во Јужна Африка, нагласувајќи дека советничката група препорача тој да се означи како „загрижувачки”.

Извор: МИА