Брестовац: Време е некој од помладите ракометари да блесне
Селекторот на ракометната репрезентација на Македонија, Данило Брестовац со денешната прозивка и официјално ги стартува подготовките за настапот на ЕП 2020 кое ќе се одржи во Австрија, Норвешка и Шведска.
Во првата фаза од подготовките која ќе помине во неколкудневни тренинзи во Скопје, а потоа ќе се играат контролни натпревари со Србија и со Романија, Брестовац ќе им даде шанса на младите ракометари да се наметнат и евентуално да се најдат на финалниот список на патници на ЕП.
– Акцентот на овие подготовки ќе биде повеќе на пријателските натпревари. Неделава на собир ќе бидат овие ракометари, кои му доаѓаат како Б-репрезнетација. Ќе видиме кој ќе се наметне од нив и кој ќе се придружи на завршните подготовки во Словенија, јас сум тренер кој верува во младите и им дава шанса.
Можеби малку грубо звучи да имаме и А-тим и Б-тим, но составите мора да се категоризираат. Имаат четири натревари да ме убедат и да успеат да обезбедат место во А-тимот. Овие ракометарите имаат проблеми во нивните клубови, имаат мала минутажа. Нивно е да ги демантираат прво своите тренери во екипите дека заслужуваат поголема минутажа, а потоа да се наметнат и тука. Очекувам дека ќе блесне некој од младите, ова не е последна шанса, но редно време е да исплива некој на површина – вели Брестовац.
Главната цел на селекторот е ракометарите да обезбедат пласман во втората фаза од ЕП.
– Украина, Чешка и Австрија се ривали во нашата група и кои можеме да ги победиме. Секако дека се ќе зависи од нас. Фокусиран сум на Украина, тоа е важен меч бидејќи со победа ќе направиме значаен чекор напред кон следната рунда, а во зависноат од исходот на мечот Чешка – Австрија ќе биде јасно и какви ќе бидат математиките пред останатите две кола – смета Брестовац.
На собирот беше и најдобриот голман во СЕХА лигата, и еден од адутите на ЕП, голманот Никола Митревски кој сигурно е најскусниот ракометар што ќе ја одработи првата фаза од подготовките. Митревски смета дека главниот адут на Македонија на ЕП е искуството и континуитетот на настапи на големите натпреварувања.
– Нашиот адут се искуството и континуитетот. Фактот дека дека голем дел од клучните ракометари подолго време играат заедно, а исто така имаме континуитет на настапи на големите натпреварувања и тоа е нешто што го немаат останатите селекции од нашата група. Имаме група во која нема изразит фаворит, квалитетот е израмнет, но тоа е наша шанса да сториме се не само за да се пласираме на ЕП, туку и да стигнеме до првото место и да пренесеме бодови кои многу би ни значеле во борбата за што повисок пласман – вели Митревски.
Втората финална фаза од подготовките ќе се одработи во Словенија кога и репрезентацијата ќе се комплетира, односно ќе се приклучат најискусните ракометари, а потоа директно одат во Австрија каде на 10 јануари во Виена играат против Украина во првото коло.