Брестовац: Најгрдата победа е поубава од најубав пораз
Кадетската репрезентација на Македонија загуби со 26:29 од фаворизираната Данска на СП. Ова беше втор пораз за кадетите и по четири кола имаат половичен ефект од по две победи и порази со кои се наоѓаат на третата позиција на табелата ви групата Ц.
Иако загубија од фаворитот Данска, младите ракометари ја одиграа најдобрата партија на мундијалот, а селекторот Данило Брестовац смета дека фалеше порасположен голман за успех против фаворизираниот ривал.
– И најгрдата победа е поубава од најубавиот пораз. Можеби игравме подобро, но пораз си е пораз. Задоволен сум од прикажаната игра, се забележува дека одиме во нагорна линија, а можеме да влеземе и во ротација. Има разлика од прикажаната игра на првите три натпревари и сега против Данска. За нешто повеќе против Данска ни недостигаше расположен голман во второто полувреме – изјави Брестовац.
Последен ривал на Македонија во групната фаза е селекцијата на Јапонија (20.30 ч.), а избраниците на Брестовац обезбедија пласман во осминафиналето на мундијалот.