Брегзит: Недела на одлука
Британскиот премиер Борис Џонсон, пред членовите на владиниот кабинет изјави дека договорот за Брегзит е сè уште можен, но дека за постигнувањето на договорот треба да се заврши уште многу работа.Оптимизмот на британскиот премиер доаѓа во време кога интензивните преговори меѓу Лондон и Брисел влегуваат во својата најкритична фаза, на само седумнаесет дена од рокот кој Британија сама си го зададе: напуштање на ЕУ со или без договор.
Во најзначајната недела во рамките на која би можело да се одлучи за иднината на Брегзитот, како и за судбината на петата по големина светска економија, Џонсон со Унијата се обидува да постигне договор за напуштање на Велика Британија, со што би овозможил на 31 октомври уреден и легален прекин на соработката со најголемите европски трговски партнери.
„Премиерот ги информираше членовите на кабинетот за постигнатиот напредок во преговорите околу Брегзитот и повтори дека се напредува кон договор со ЕУ кој ќе ги заштити сите бртиански интереси“- изјави портпаролот на Владата во Лондон.
Британските медиуми наведуваат дека Џонсон во текот на утрешниот ден ќе разговара со германската канцаларка Ангела Меркел и францускиот претседател Емануел Макрон како и со европските челници за напуштање на Британија од ЕУ до 31 октомври годинава.