Бразилската полиција го обвини наводниот лидер на „транснационалната криминална организација“ дека е мозокот зад убиствата на Дом Филипс и Бруно Переира во Амазон пред една година, пренесува „Гардијан“.

Британскиот новинар и бразилскиот домороден експерт биле застрелани додека се враќале од известување во оддалечениот регион на долината Јавари на 5 јуни 2022 година.

Тројца локални рибари моментално се во затвор и чекаат евентуално судење под сомнение за убиството на Филипс и Переира, поранешен владин функционер кој им помагал на домородните активисти да ги бранат своите земји од нелегални банди за риболов и рударство.

Синоќа бразилската телевизија „ТВ Глобо“ откри дека федералната полиција официјално обвинила уште двајца мажи за убиствата.

Полицијата ги уапсила Рубен Дарио да Силва Вилар, наводниот лидер на транснационална илегална рибарска мрежа која оперирала во триграничниот регион помеѓу Бразил, Колумбија и Перу и Јанио Фреитас де Соуза, рибар кој наводно бил еден од послушниците на Силва Вилар покрај реката Итакваи каде што биле убиени Филипс и Переира.

Федералната полиција го обвини Силва Вилар – познат по прекарот Колумбија – дека наредил убиства и прикривање на телата на жртвите. Соуза бил обвинет за учество во двете кривични дела.

Во обвинението на федералната полиција се вели дека полициските истраги покажале дека Силва Вилар и Соуза постојано зборувале во деновите пред и по минатогодишното злосторство.

За време на интервјуто со полицијата во 2022 година, Соуза, наводно, тврдел дека го познавал Силва Вилар „по видување“. Но, според обвинението на федералната полиција, вкупно 419 повици биле направени меѓу двајцата мажи помеѓу 1 јуни 2022 година – кога Филипс и Переира пристигнале во Јавари за да започнат четиридневно патување за известување – и 6 јуни, ден откако биле убиени.

Доказите собрани во текот на едногодишната истрага сугерираат дека „чекорите на Бруно и Дом биле следени од криминалната организација“ во деновите пред злосторството.