Засега се тече во најдобар ред, нема голем застој, наставниците се задоволни од процесот на вакцинација, велат од Општина Карпош за „Слободен печат“, каде од вчера започна процесот на имунизација на просветните работници, со приоритет на оние кои држат настава со физичко присуство.

– Од сите десет основни училишта во рамките на општината има голем број на заинтересирани наставници за вакцинација, а откако први ќе ја примаат вакцината оние кои им држат настава на учениците до трето одделение, потоа ќе следува вакцинација и за останатите – додаваат од општина Карпош, посочувајќи дека целиот процес се одвива во координација со Министерството за образование и наука.

– Вакцинацијата е дел од планот за имунизација, наставниците се организирани преку Министерството за образование и наука. По основните училишта во Општината, очекуваме вакцинацијата да продолжи и во градинките – заклучија од Општина Карпош.