Горан Јовановски, братот на исчезнатиот скопјанец Мартин на својот Фејсбук пофил сподели фотографија и порака граѓаните да помогнат во пронаоѓањето на неговиот брат по кого петти ден трагаат грчките крајбрежни служби и волонтери.

Ова е сликата направена од денот на исчезнувањето на мојот брат. Потрагата се уште е во тек меѓутоа со многу намален капацитет. Потребна ни е поголема покриеност од воздух, копно и вода. Доколку некој има било каква информација и е во можност на било кој начин да помогне во потрагата по мојот брат слободно исконтактирајте ме. Ве молам споделете ја фотографијата за волонтерите што помагаат да имаат појасна слика, напиша Горан.

На фотографијата се облеката на неговиот брат кој критичниот ден во саботата заедно со другарите Васил и Иван славеле роденден на плажата Посиди, на Халидики, по што откако влегле во водата биле одвлечени од брегот од страна на морските струи. Васил е пронајден неколку часа потоа, а Иван следниот ден по 19 часа поминати на отворено море, држејќи се за топка која и му го спаси животот во борбата со брановите.

Мартин е искусен пливач, поранешен балетан во добра физичка кондиција и не се губат надежите дека момчето ќе биде пронајдено. Грчките спасувачки служби го пролонгираат периодот на потрага кој вообичаено истекува 72 часа по исчезнувањето, а по ургенции на министерот за надворешни работи Бујар Османи кај неговиот колега Никос Дендијас.

Вчера се пребаруваше морското дно со подводна камера но немаше резултати, а денеска на петтиот ден освен волонтерите и крајбрежната стража вклучени се и два воздушни дронови за непристапниот карпест терен и куче спасител кое трага по Мартин на плажите во претпоставен радиус во кој би можело да биде 31-годишното момче.