Ботас најдобар во Јапонија, нова титула за Мерцедес
Возачот на Мерцедес, Валтери Ботас триумфираше денеска во трката од Формула 1 шампионатот за Големата награда на Јапонија, а неговата екипа ја освои шестата титула кај конструкторите.
Ботас ја оствари шестата победа во кариерата, трета оваа сезона, а прва на патеката „Сузука“. Поради тајфунот „Хагибис“ саботните квалификации беа одложени за в недела, па така во еден ден беа одржани и борбата за пол позиција и главната трка.
Второто место го освои возачот на Ферари, Себастијан Фетел кој стартуваше од пол позицијата, додека трет беше актуелниот шампион, возачот на Мерцедес Луис Хамилтон. Британецот освои и додатен бод за најбрз круг на трката.
SIX-IN-A-ROW! ??????
Congratulations @MercedesAMGF1 – champions again!!! #JapaneseGP ?? #F1 pic.twitter.com/YiEsk14wtF
— Formula 1 (@F1) October 13, 2019
Редоследно од четвртата до 10 позиција се најдоа Александар Албон (Ред Бул), Карлос Сајнц (Мекларен), Шарл Леклер (Ферари), Даниел Рикардо (Рено), Пјер Гасли (Торо Росо), Нико Хулкенберг (Рено) и Ленс Строл (Рејсинг Поинт-БВТ Мерцедес).
На четири трки до крајот на сезоната Хамилтон води со 338 бодови, пред Ботас (273) и Леклер (223).
Наредната трка ќе се вози на 27 октомври за Големата награда на Мексико.