Бошњаковски: Нема никаков документ со кој Турција не условува за НАТО
Нема никаков документ од страна на Република Турција за условување на ратификацијата на Протоколот за членството на Северна Македонија во НАТО, информираат од македонската Влада.
– Со Република Турција имаме одлична соработка во полето на одбраната и сме стратегиски партнери во рамките на НАТО Алијансата. Не постои никаков документ за условување на ратификацијата за нашето членство во НАТО од страна на Република Турција – изјави за „Слободен печат“ портпаролот на Владата, Миле Бошњаковски.
Грчкиот весник „Катимерини“ денеска објави напис во кој пишува дека Турција наводно ја условува Северна Македонија за одложување на ратификацијата на Протоколот за членство во НАТО доколку Северна Македонија не екстрадира 15 турски државјани кои Анкара ги обвинува за вмешаност во неуспешниот државен удар на терористичката организација ФЕТО кој се случи на 15 јули 2016 година.
Во врска со ваквиот напис, Бошњаковски нагласи дека „Владата на Република Северна Македонија не коментира медиумски шпекулации“.