Високиот претставник за надворешна политика на ЕУ, Јосеп Борел, изјави дека Западен Балкан ќе биде негов приоритет се додека е на оваа функција. Вели дека рестартирањето на дијалогот помеѓу Приштина и Белград ќе биде на врвот на неговата агенда.

Тој утре ќе патува за Приштина, а се очекува потоа да го посети и Белград.

-Силно се ангажирам да дијалогот кој е по посредство на ЕУ да се рестартира и поради оваа причина ќе ги посетам Косово и Србија, како први земји од регионот во текот на оваа недела-, напиша Борел на твитер.

Дијалогот за нормализирање на односите меѓу двете страни е закочен веќе година и половина поради царините што ги воведе Косово врз српските производи.

Европските дипломати се надеваат дека ќе успеат да изнајдат решение со новата косовска Влада за надминување на овој спор, што е предуслов за Белград повторно да се ангажира во преговорите.