Високиот претставник на Европската унија за надворешна политика и безбедност, Жозеп Борел денеска ја повика воената хунта во Мјанмар да престане со насилството на протестите во таа земја, за време на кои денеска беа убиени најмалку 18 лица.

Во објава на Твитер, Борел предупреди дека ЕУ ќе преземе мерки како одговор и истакна дека ЕУ „одлучно се залага за храбриот народ на Мјанмар”.

Тој посочи дека воената хунта во Мјанмар мора да сноси одговорност за тие активности.

– Војската на Мјанмар мора да престане со бруталната репресија над мирните демонстранти, во која многумина се мртви или ранети, отворено непочитувајќи го меѓународното право, напиша Борел.

#Myanmar military must stop its brutal repression of peaceful protests, leaving many dead or wounded, blatantly disregarding international law. They must be held to account.
The European Union resolutely stands with the brave people of Myanmar & will take measures in response. https://t.co/owf1Yfca1s

— Josep Borrell Fontelles (@JosepBorrellF) February 28, 2021

Канцеларијата за човекови права на ООН соопшти дека најмалку 18 лица се убиени, а над 30 се повредени денеска во Мјанмар, откако полицијата отвори оган врз демонстрантите кои протестираа против пучот и апсењето на легално избраната премиерка Аунг Сан Су Ќи.

Мјанмар е во хаос веќе еден месец, откако армијата изврши државен удар и ја приведе премиерката Аунг Сан Су Ќи и бројни други политичари, нејзини сопартијци, за наводна измама на изборите во ноември.

Некои западни земји воведоа ограничени санкции за воената хунта и го осудија пучот извршен од хунтата.

ВИДЕО | Масакр на протестите во Мјанмар: Војската пукаше врз демонстрантите – 18 загинати