Борачот Нуров со три победи обезбеди полуфинале на Медитеранските игри
Магомедгаџи Нуров успешно го претставува македонското борење на Медитеранските игри кои се одржуваат во Оран, Алжир.
Нашиот натпреварувач во категоријата до 97 килограми денеска запиша три победи кои му обезбедија полуфинале и борба за медал.
Беше убедлив во трите борби, на стартот со 13:2 го елиминираше Мохамед Саадауи од Тунис.
Потоа, со 10:0 триумфираше против Алжирецот Мохамед Фардж, а со истиот резултат го совлада и Алехандро Канада Панкорбо.
Во полуфиналето Нуров ќе ги одмери силите против Мостафа Елдерс од Египет со почеток од 18.40 часот по македонско време, а во втората полуфинална борба Тунижанецот Саадауи за ривал го има Фејзулах Актурк од Турција. Повеќе на следниот линк ТУКА
Од другите македонски борачи Фати Вејсели во четвртфиналето во категоријата 74 кг. со 4:0 загуби од Алексиос Кауслидис (Кипар), додека во истата фаза Владимир Егоров е елиминиран од Египќанецот Јехија Хафез во категоријата 65 кг.
