Пејачот на ирскиот рок бенд „U2“, Боно, откри дека има полубрат за кој со децении не знаел дека постои, пишува „Би-би-си“.

„Имам уште еден брат, кого го сакам и обожавам, не знаев дека го имам“, изјави Боно на „Desert Island Discs“ на „BBC Radio 4“. Пејачот рече дека дознал за својот полубрат во 2000 година.

Боно истакна дека неговата мајка Ајрис, која починала во 1974 година, не знаела дека нејзиниот сопруг имал дете со друга жена.

„Тоа е многу блиско семејство и сфатив дека татко ми има длабоко пријателство со таа прекрасна жена… А, потоа добиле бебе. И сето тоа беше чувано во тајност“, рекол Боно, додавајќи дека кога дознал, разговарал со својот татко Боб пред неговата смрт во 2001 година.

Тој го прашал својот татко дали ја сакал неговата мајка и тој му рекол дека ја сакал. Тогаш пејачот го прашал „Па, тогаш како можеше да се случи тоа?!“, а неговиот татко одговорил: „Можеше“.