Американскиот претседател Доналд Трамп денес ќе го испрати воениот брод-болница на пат кон Њујорк, за да нагласи дека федералните власти имаат одговор на епидемијата на коронавирусот.

Воениот брод „Комфорт“, со капацитет од над илјада болнички кревети, бил на редовен ремонт кога стигнала наредбата итно да се оспособи за да им се пружи помош на заболените во Њујорк, епицентарот на епидемијата во САД.

Трамп рече дека неговиот пат во военото пристаниште Норфолк не е неопходен, но дека одлучил да оди таму за да му се заблагодари на воениот ремонтен тим и на здравствените работници кои работеле на сервисирањето на бродот „Комфорт“. Тимот ја завршил работата и ремонтот повеќе од една недела пред утврдениот рок.

– Нема да се прегрнувам и бакнувам со луѓето, но ќе упатам јасна порака на благодарност – рече Трамп.

When you need the very best – Ready on Arrival!#USNSMercy arrived in Los Angeles, Calif., on Friday and will begin seeing patients this weekend. Later today her sister ship, #USNSComfort will depart Norfolk, Va., and head to New York City. #COVID19 #USNavyAlwaysThere pic.twitter.com/dQN6XzFfD7

— U.S. Navy (@USNavy) March 28, 2020

Бродот „Комфорт“ некогаш служел како нафтен танкер, а потоа е преуреден во пловечки ургентен трауматолошки центар за американски војници ранети за време на борбени дејствија, но за време на новата мисија во Њујорк тој ќе претставува цивилна болница.

Овој брод кој е стар речиси цел век има 1.000 медицински работници, 12 операциони сали, одделенија за радиологија и интензивна нега, скенер, лабораторија и аптека. Во минатото бил оперативен во слични ситуации единствено за време на Првата светска војна и за време на пандемијата на шпанскиот грип по неа.