Боки 13 од газдата на винаријата „Еземит“ барал два милиони евра
Во Кривичниот суд во Скопје денеска продолжи распитот на сведоците во предметот „Рекет“ во кој првообвинет е Бојан Јовановски, викан Боки 13, и поранешната шефица на СЈО, Катица Јанева.
Предметот го води судијката Васка Николовска-Масевска.
Јанева е обвинета за злоупотреба на службената положба и овластување, додека Јовановски е обвинет за примање награда за противзаконито влијание и за перење пари и други приноси од казниво дело.
Прв денеска сведочеше адвокатот Сашко Бошков. Сведокот рече дека во ноември лани му се јавил кошаркарот Владо Илиевски и му кажал дека Боки 13 сакал да се сретне со нив во 1ТВ. Тогаш Боки 13 го прашал дали е близок со Зоран Митровски од винаријата “Еземит” и му кажал дека имал предмети во СЈО.
– Јас му кажав дека има само еден предмет со “Поштенска Банка”, на што обвинетиот рече не е еден предмет туку се повеќе – рече Бошков.
Во врска со предметите и помошта Јовановски побарал два милиони евра, предлог кој бил одбиен.
– Му пренесов на Зоран Митровски кој реагираше бурно и се исплаши. Ми рече дека не чувствува потреба да даде пари. Прво се плашеше, но потоа случајот го пријави – рече сведокот Бошков.
Според сознанијата на сведокот, бараните пари никогаш не биле исплатени.