Општина Центар денеска го презентираше Локалниот еколошки акционен план- ЛЕАП за периодот 2019-2025 година. Градоначалникот Богдановиќ денеска на презентацијата на планот рече дека ова претставува стратешки документ со кој ќе се обезбеди заштита на животната средина и повисок квалитет на живеење за граѓаните.

– Леап документот претставува уште една потврда за продолжување на нашите напори да воспоставиме успешна соработка со еколошките невладини организации и да добиеме насоки за развивање на дијалогот со бизнис заедницата. Работиме на почитување на законските одредби и зајакнување на капацитетите на бизнис заеднциата, со цел да се постигне намалување на потрошувачката на природни ресурси и емисии во медиумите на животната средина, рече Богдановиќ.

Богдановиќ исто така посочи дека со овој план ќе се подобри еколошката слика во општината.

– Со ваше активно учество, ги идентификувавме сегашните состојби со медиумите во животната средина и ги евидентиравме клучните предизвици изразени во: нарушениот квалитет на воздухот, управувањето со отпадот и зголеменото ниво на бучава и градежната експанзија.Тоа се состојби со кои се соочуваме во нашето секојдневие во доменот на животната средина и за истите дадовме предлог акции и мерки за нивно ефикасно надминување, дополни градоначалникот и најави залагање за проширување на надлежностите поврзани со заштита на животната средина на локално ниво, како и донесување и реализација на урбанистичка планска документација согласно стандардите и нормативите во кои ќе се запазува процентот на зелени површини.