Фудбалерот на Фиорентина, Кевин Принс Боатенг во интервјуто кое го имаше за „Ла Република“ рече дека на почетокот од кариерата се однесувал како идиот, поради начинот на живеење.

– Купив три автомобили во еден ден, додека играв за Тотенхем. Си купив „Кадилак“, „Ламборџини“ и „Хамер“. Бев идиот. Имав голем талент, кој воопшто не го искористив, бидејќи не сакав да тренирам. Доцнев на секој тренинг, а прв од него излегував, наместо вредно да тренирам. Не одев ниту во теретана, туку излегував со пријателите до градот. Воопшто не сум го третирал фудбалот како работа – рече Боатенг.

Поранешниот репрезентативец на Гана сега своето искуство го користи со цел да им помогне на помладите колеги.

– Секогаш им велам на помладите соиграчи дека со материјалните нешта не се купува среќа, ниту се решаваат проблемите. Мораат да бидат психички силни и да се борат. Нови автомобили ви донесуваат среќа, но за кратко. После тоа станувате свесни дека тоа е само обично нешто и се враќаат проблемите кои ги имате. Јас имав семејни проблеми поради кои страдав, не играв во клубот, и преку излегување и купување на скапи предмети сакав да ја „покријам“ мојата состојба – додаде Боатенг.

На фудбалски план од ова лето играчот е дел од италијанската екипа на Фиорентина.