Просечната цена за литар извезено флаширано македонско вино е зголемена од 1,14 евра во 2020 година, на 2,11 евра во 2023 година. Истовремено, во последните неколку години променета е и структурата на извозот, при што сега близу 40 проценти од извезеното македонско вино во странство е флаширано, што генерира дури над 70 отсто од вредноста на целокупно извезеното вино. Овие податоци ги сподели Здружението „Вина од Македонија“, во кое членуваат најголемите производители и извозници на македонско вино.

Оттаму велат дека до оваа состојба е дојдено со нивни големи заложби, но алармираат да се преземат уште чекори за да имаме поквлалитетно вино и поскап извозен производ. Според Здружението, постојат потврдени начини и чекори кои треба да се преземат: Воведување и почитување на светските стандарди и практики во лозарството кои треба да обезбедат повисок квалитет на грозјето и виното; Вложувања во развој на современо лозарство, преку набавка на соодветна механизација, окрупнување на земјиштето, субвенции за производство со географски ознаки и слично, со кои ќе овозможи намалување на трошоците за производство на грозје; Обезбедување поддршка за винарниците кои вложуваат во производство на висококвалитетни вина со контролирано и гарантирано потекло, во напредни технологии и одржлив развој, како и поддршка за зголемување на извозот и позиционирање на македонското вино на светската винска мапа, што носи долгорочни придобивки за сите, вклучително и за лозарите и државата.

„Целта на „Вина од Македонија“ и на неговите членки, е во наредниот период, преку имплементацијата на споменатите чекори и со соодветна поддршка од државата, да продолжи да расте цената на македонското вино што се пласира на странските пазари и притоа целокупното извезено вино да биде флаширано, за да ја намалиме можноста нашето наливно вино да се пакува во странство и потоа како брендиран производ да ни се појавува како конкуренција на нашите вина на странските пазари“, соопштија од Здружението.

Здружението вели и дека единствен начин да се спречи натамошното финансиско исцрпување и пропаѓање на дополнителен број македонски винарници е цената на грозјето да се утврдува помеѓу производителите на грозје и вино, според пазарни механизми на понуда и побарувачка и показатели кои се применуваат секаде во светот, како што се: приносот, квалитетот и географската ознака.

„На таков начин, домашните винарници ќе можат да останат конкурентни и ќе можат да продолжат да вложуваат во развојот и производството на квалитетно вино кое ќе може да постигне повисока цена на пазарот, со што тие ќе можат да платат и повисоки цени за грозјето кое го откупуваат од лозарите“, заклучува Здружението.