Блинкен смета дека целта на Путин е да го „избрише идентитетот на Украина како независна нација“

Ентони Блинкен
Ентони Блинкен / Фото: EPA-EFE/KAY NIETFELD / POOL

Американскиот државен секретар Ентони Блинкен изјави дека целта на Владимир Путин е да го избрише идентитетот на Украина како независна, суверена нација и да го апсорбира во Русија.

„Оваа војна е напад не само врз Украина, туку и врз меѓународниот поредок заснован на правила што се обидуваат да го одбранат меѓународниот мир и стабилност и да поддржат, според Повелбата на Обединетите нации, „еднакви права на мажите и жените и големи и мали народи“, посочи Блинкен на виртуелна панел сесија на тема „Праведен и траен мир во Украина“, пред утрешното отворање на вториот Самит за демократија

Тој потсети дека жртви на руската агресија не се само Украинците, туку и луѓе ширум светот, се вели во соопштението на Стејт департментот.

„За мирот да биде праведен, тој мора да ги поддржува принципите во срцето на Повелбата на ОН – суверенитет, територијален интегритет, независност. А за мирот да биде траен, мора да обезбеди дека Русија не може да се одмори и да ги оспособи своите трупи, а потоа повторно да покрене војна во времето кое за неа е поповолно“, рече американскиот државен секретар и додаде дека не се работи само за иднината на Украина, туку и за иднината на меѓународниот поредок.

Министерот за надворешни работи на Украина Дмитро Кулеба изјави дека Русија има за цел да го уништи светскиот поредок врз основа на меѓународното право и Повелбата на ОН.

„Украинскиот народ ќе прифати мир само доколку гарантира целосен прекин на руската агресија, целосно повлекување на руските трупи од украинска територија и обновување на територијалниот интегритет на нашата земја во меѓународно признатите граници“, рече украинскиот министер, истакнувајќи дека мировниот план беше признат и одобрен од Генералното собрание на Обединетите нации.

Како што додаде, Русија прибегнува кон нуклеарни уцени и закани, како и закани за еколошката и енергетската стабилност и безбедноста на храната, а агресијата е проследена со грозоморни злосторства, при што се верува дека во Мариупол биле убиени десетици илјади цивили.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот