Блинкен: САД интензивно работат на ставање крај на израелско-палестинското насилство
Американскиот државен секретар Ентони Блинкен денеска ги повика страните во израелско-палестинскиот судир да ги заштитат цивилите и истакна дека САД интензивно работат на завршување на конфликтот.
– Работиме дење и ноќе преку дипломатски канали за да ставиме крај на конфликтот, истакна Блинкен на заедничката прес-конференција со данскиот министер за надворешни работи Јепе Кофод во Копенхаген.
Веќе втора седмица Израел бомбардира цели во Појасот Газа, а палестинските милитанти истрелуваат ракети врз израелските градови. Според палестински болнички извори во израелските напади загинале 198 луѓе од кои 58 деца и 34 жени, а во нападите од Хамас загинале десетина луѓе, од кои две деца.
Блинкен истакна дека Израел има право на самоодбрана, но оти е вознемирен од вестите дека новинари и медицински персонал се изложени на ризик, посебно откако Израел во саботата ја уништи зградата на американската новинска агенција Асошиејтед прес и други медиуми.
– САД побара од Израел појаснување за нападот, истакна Блинкен.