Бизарна смрт во Бугарија: Со лажно име влегол во боксерски ринг и умрел од срцев удар
Бугарскиот боксер Борис Станчов почина за време на борба во ринг откако се борел под името и лиценцата на неговиот роднина Исус Величков.
Станчов наместо својот роднина се борел во перолесната категорија против Албанецот Ардит Мурја во саботата вечер, а трагичните детали за инцидентот испливаа на површината оваа недела, објави „Телеграф.рс.“.
Станчов колабираше во петата рунда на борбата и повеќе не стана поради срцевиот удар. Некои медиуми наведуваат дека Станчов боксувал наместо Исус за да стекне искуство и за да не собира порази во кариерата под своето име.
– Се бореше со мојата лиценца од 2018 година, не беше проблем, тренерот знаеше – рече подоцна Исус.
Светскиот боксерски сојуз дури изрази сочувство и на погрешниот боксер, мислејќи дека смртно настрадал 21-годишниот Величков.
За потсетување, во јули оваа година рускиот боксер Максим Дадашев почина поради повреди на мозокот кои ги здобил во борба. Истиот месец срцев удар имаше и Аргентинецот Хуго Сантилијан кој исто така настрада во рингот.