Бивши офицер на британската армија предупредува дека можен е напад на аеродромот во Кабул
Разузнавачките информации дека борците на Исламска држава подготвуваат напад врз луѓето кои сакаат да полетаат од аеродромот во Кабул се „многу, многу веродостојни”, изјави денеска поранешниот офицер на британската армија, Џејмс Хипеј.
Британското Министерство за надворешни работи синоќа ги предупреди своите граѓани да не се приближуваат до меѓународниот аеродром „Хамид Карзаи”, каде илјадници луѓе се обидуваат да се качат на некои од летовите кои се обидуваат да ги евакуираат странците и нивните поранешни авганистански соработници до 31 август, крајниот рок за повлекување на американските војници, „бидејќи би можеле да бидат цел на одмазда на талибанците”.
– Сега има многу, многу веродостојни дојави за неизбежен напад и затоа Форин офисот синоќа ги советуваше луѓето да не се приближуваат до аеродромот во Кабул. Тие мора да се засолнат на безбедно место и да чекаат нови инструкции, изјави Хипеј за Би-Би-Си радио.
Тој предупреди на сложеноста на ситуацијата во главниот град на Авганистан.
– Не можам доволно да нагласам колку е очајна ситуацијата. Заканата е веродостојна, рече Хипеј, додавајќи дека огромни групи очајни луѓе чекаат пред аеродромот и сакаат да ја искористат можноста.
Според него, има 400 луѓе кои треба да бидат евакуирани, главно британски државјани и оние со двојно државјанство.
– Јасно е дека правиме се што можеме за да најдеме безбедни коридори да ги однесеме на безбедно, рече Хипеј.
Велика Британија евакуираше повеќе од 12.000 луѓе од Авганистан и планира денеска да изведе 11 летови
