Битиќи: Да ги искористиме нашите потенцијали и да создадеме конкурентен регион, наместо конкуренција помеѓу земјите во регионот

Вистинското лидерство бара да анализираме и да учиме од искуствата, но многу повеќе бара да можеме да видиме преку „ѕидот” и да ја гледаме иднината и можностите во неа. Денеска заедно со вас тука, сакам да ја видиме сликата за развој на земјите од Западен Балкан во пост ковид периодот. За мене таа е јасна како нов ден кога се раѓа. Регионална конкурентност наместо регионална конкуренција. Ова е нашата иднина, порача вицепремиерот  за економски прашања Фатмир Битиќи на регионалната економска конференција „Економското влијание и последиците од кризата”, која се одржа во Приштина.

Тој посочи дека ваквите регионални конференции се потребни за да се направи анализа и да се дискутира за економската состојба во земјите од регионот во изминатата година, која беше подеднакво тешка за сите и нагласи дека кризата предизвикана од Ковид 19 бара да се покаже лидерство и одлучност во справување со препреките и соодветно да се одговори на кризната ситуација.

-Регионалната конкурентност е клучот кој ја отвора вратата за просперитет на Западен Балкан. Иднина, во која нашиот регион ќе влезе во ера на соработка, за просперитет на сите наши народи. Преку зацврстување на економската соработка и зацврстување и интеграција на вредносниот синџир помеѓу домашните и странските инвестиции. Зајакнување на довербата и унапредување на трговската соработка. Ова треба да биде Балканот на 21-виот век. Заеднички, оваа криза, која веќе со се помасовната имунизација ја оставаме зад нас, да ја претвориме во предност, во шанса за светла иднина на нашите држави, рече Битиќи на свеченото отворање на конференцијата.

Вицепремиерот истакна дека јакнењето на економската соработка помеѓу земјите од Западен Балкан е од заеднички интерес, за во целост да се искористат и развијат сите расположливи потенцијали.

-Есенцијално за сите нас е остварувањето на целите од Берлинскиот процес, кој претпоставува воспоставување на Заеднички регионален пазар, заснован на пристапот на четирите слободи – слободно движење на добра, услуги, капитал и луѓе, или четирите слободи на кои се заснова Европската Унија. Заедничкиот регионален пазар ќе ја зајакне економската соработка помеѓу земјите во регионот што ќе ја зголеми нашата конкурентност, но и привлечноста на регионот за пазарот на Европската Унија, додаде Битиќи и нагласи дека треба да се оди и чекор понапред.

Потсети дека пред помалку од две недели на управниот одбор на Коморскиот инвестициски форум за Западен Балкан, заедно со претседателите на форумот, покрена иницијатива, за која, како што рече, лично се заложувам да заживее за време на мојот мандат.

-Тоа е креирање на регионален пристап и услови за странски инвестиции за сите земји од Западен Балкан. Дополнително засилување на соработката помеѓу нашите домашни, балкански компании и странските компании кои се заинтересирани да инвестираат во нашиот регион. Силен вредносен синџир е победа за сите нас. Ова ќе ја зголеми отпорноста на регионот кон ризиците од било кој тип и ќе jа зајакне нашата способност да се справуваме со предизвиците и непредвидливите појави, како што е случајот со моменталната пандемија.  Ќе донесе просперитет за нашите граѓани, ќе го зацврсти пазарот на труд. Ќе донесе напредок и иднина за регионот на Западен Балкан и ќе ги подготви нашите економии за влез во Европската Унија. Регионалната конкурентност е нашата шанса од оваа криза да излеземе подобри и посилни од било кога, потенцираше вицепремиерот.

Подвлече дека регионот на Западен Балкан има многу предности и дека мора да се искористат за подигнување на конкурентноста во сите земји, но и на регионот генерално. Посочи дека конкурентноста и предноста ја гледа во достапноста и близината на синџирите за набавка на добра и услуги, транспортот и меѓусебната поврзаност, како патната, железничката, но и водната, преку блиските пристаништа на нашите соседи, близината на европските пазари до нашиот регион и можноста за „near shoring”.

-Не мораме да чекаме нашите земји да ги завршат процесите за евроинтеграции за да се приближиме кон стандардот на ЕУ со унапредување на пазарот.  За крај ќе повторам уште еднаш, зошто во ова цврсто верувам: Регионална конкурентност, наспроти регионална конкуренција. Ова е нашата иднина. Да ја изградиме подобра, заедно,  го заврши своето обраќање вицепремиерот Битиќи.

На регионалната економска конференција се обратија и министерката за трговија, претприемништво и индустрија на Република Косово, Розета Хајдари,  директорот на Фондот за Западен Балкан, Ѓерѓ Мура, претседателот на Сеалбанскиот економски форум Нагип Фејзи, претседателот на Стопанската комора на Косово, Скендер Красниќи, претседателот на Стопанската комора на Северозападна Македонија, Неби Хоџа, како и други еминентни лица од политиката и бизнисот од регионот.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот