Биеналето за современи уметности „Словокулт – литерАРТура“ годинава се одржува во Гевгелија на 4 септември, во Скопје на 7 септември и во Берлин од 12 до 14 ноември 2020. Настанот во Гевгелија е дел од „БОШ фестивал“ на тема „План Б за Планетата Х или План Х за Планетата А“, која е презентирана со дела на ликовни и интердисциплинарни уметници, како Дорит Требелјар, Антон Шварцбах и Ајке Леуен од Германија, Од Карбон од Франција и македонските уметници Елизабета Линднер Костадиновска, Ирена Паскали, Дијана Томиќ Радевска, Славица Јанешлиева, Иван Ивановски, Нина Гештаковска Цветковска, Велимир Жерновски и Марко Вујисиќ.

Главниот дел на настанот е мултимедијален книжевен перформанс (текст/слика/звук), на кој настапуваат авторите од Македонија: Владимир Лукаш, Марија Грубор, Јовица Ивановски, Мануела Златкова, Исток Улчар, Јосип Коцев, Александар Кирковски, македонската авторка од Берлин Елизабета Линднер Костадиновска, германската авторка од Келн, Гундула Шифер, и Звонко Карановиќ од Србија. Мултимедијалниот перформанс содржи и видео презентација на германскиот поет Краус и уредниците на берлинското авангардно списание „Пролог“ – Дорит Требелјар и Антон Шварцбах, како и на Танос Гогос од Грција и Марија Дејановиќ од Хрватска.

Настанот на 7 септември во Скопје ќе се одржи во Културно-информативниот центар со изложба (18 часот) и мултимедијален книжевен перформанс (20 часот), каде на учесниците од Гевгелија ќе им се придружи и Сања Михајловиќ-Костадиновска, а ќе има и видео презентација на Василија Иконому од Грција. Плакатот за второто издание на биеналето е дизајниран од уметницата Катрин Салентин.

Биеналето е во организација на „Словокулт – литерАРТура“ и „Арт еквилибриум“. Уметнички директор е Елизабета Линднер, која соработува со Дијана Томиќ Радевска и Марија Стојанова. За настаните во РС Македонија биеналето има поддршка од Министерството за култура.

(Текстот е објавен во „Културен печат“ број 47, во печатеното издание на „Слободен печат“ на 5-6 септември 2020)