Без Миовски и Алиоски ќе атакуваме на победа против Азербејџан
Селекторот на македонската А репрезентација, Благоја Милевски и репрезентативецот Енис Барди на официјална прес-конференција говореа за очекувањата од утрешниот пријателски натпревар против Азербејџан на Националната арена „Тодор Проески“ – Скопје.
Контролниот меч ќе се игра од 14.00 часот, Милевски за жал нема да ги има на располагање Бојан Миовски поради болест, а поради приватни причини ослободен е Езџан Алиоски.
– Ќе мора да играме без Миовски и Алиоски. Ние на секој натпревар играме да победиме, нема да биде поразлично и утре. Секогаш играме на победа, се надевам така ќе биде и против Азербејџан. Знам дека Азебејџан добро нè скаутирал, но се надевам дека нашиот квалитет ќе излезе на површина и ќе стигнеме до победа. Јас инсистирав на вакви противници, различни и квалитетни, Финска е топ репрезентација, Азербејџан игра навидум поразличен фудбал, но нивните последните натпревари го потврдуваат нивниот квалитет, очигледно е дека селекторот добро си ја работи работата. Имаат одлични индивидуалци и се агресивни. Ние имаме квалитет, слабостите ги анализиравме од мечот со Финска, мислам дека се тоа моменти на деконцентрација и ќе направиме сè да ги поправиме грешките, кои не смееме да ги имаме на официјалните мечеви следната година со оглед на квалитетот на противниците – изјави Милевски.
Барди, стрелецот на израмнувачкиот гол против Финците вели дека треба да се поправат малите грешки кои ги имаа пред два дена.
– Денеска нема фаворити во фудбалот, на нас е да одиграме максимално добро. Ја анализиравме средбата со Финска, треба да ги поправиме малите грешки што ги имавме, се надевам на позитивен резултат со Азербејџан. Противникот е физички силен, ние ќе ги нападнеме и сакаме да дојдеме до победа за поголема самодоверба и со успех да ја завршиме годината – се зборовите на играчот на Трабзонспор.
ВИДЕО: Македонија нема пораз во досегашните натпревари против Азербејџан