Општина Штип и за наредната година ќе обезбеди бесплатен престој во детските градинки за децата на самохрани родители. Билјана Казанџиска раководител на Секторот за јавни дејности, ЛЕР и образование на денешната прес-конференција истакна дека за таа намена во буџетот за 2020 година имаат предвидено 1.700.000 денари. Дополнителни средства се обезбедени и од Министерството за локална самоуправа за обезбедување на престој на децата од ромската заедница на возраст од три до пет години. Оваа Програма се спроведува веќе втора година по ред.

– Министерство за локална самоуправа на Општина Штип додели средства за имплементација на програми за бесплатно вклучување на деца Роми од три до пет години од Општина Штип во предучилишно-воспитно образовен процес за 2019 година за период од 15.09.2019 до 15.09.2020 година. Од Министерството за локална самоуправа на Општина Штип за 2018 година и се доделени 227.000 денариза вклучување на 15 деца и за 2029 година 180.000 денари за вклучување на 12 деца, или вкупно 27 дечиња се вклучени во градинките во Општина Штип- вели Казанџиска.

Таа забележа дека во текот на минатиот период Општината заедно со ресорните министерства, но и со помош на амбасадорите на Јапонија и Швајцарија направени се сериозни и големи реконструкции во градинките во Штип.