Заокружување на патната и на железничката инфраструктура на Коридорот 8 и Коридорот 10, изградба на магистрални гасоводи и инвестиции во системи за управување со цврст отпад, се клучните приоритети што ќе се реализираат со финансиска поддршка на ЕБОР. Ова, како што соопшти Министерството за финансии, е истакнато на средбата помеѓу министерот за финансии, Фатмир Бесими и регионалниот директор на банката за Западен Балкан, Жужана Хaргитаи.

– Потребни се проекти што ќе го придвижат економскиот раст. Со изградбата на автопатот Скопје – Блаце и автопатската делница Кичево – Гостивар, ќе се заокружи патниот Коридор VIII и патниот Коридор X. Меѓу идните проекти финансирани од ЕБОР се и рехабилитацијата на источниот дел од железничката пруга на Коридор VIII како и реконструкција на железничката линија Скопје – Кичево, а во енергетскиот дел се магистралните гасоводи делницата Гостивар – Кичево и делницата Свети Николе – Велес, како и интерконективниот гасовод меѓу Македонија и Косово. Овие проекти се приоритетни и мора да се реализираат, истакна министерот Бесими.

Директорката Хaргитаи рече дека мора да има приоритет на проектите и оти тие мора да се спроведат брзо. Таа нагласи дека е важно да се реализираат започнатите инвестиции во патната, во железничката и во енергетската инфраструктура, да се направат приоритети на нови инфраструктурни проекти и приватниот сектор да се вклучи во инфраструктурниот развој.