Бела куќа: Бајден му остава на Сенатот да одлучи за судењето на Трамп
Американскиот претседател Џо Бајден ќе остави на Сенатот да донесе одлука за начинот на продолжување на судењето на поранешниот претседател Доналд Трамп, нагласи портпаролката на Белата куќа, Џен Псаки.
– Убедени сме дека Сенатот може да ја исполни својата уставна должност додека истовремено работи и за американскиот народ, изјави Псаки на брифинг во Белата куќа.
Демократот Бајден положи заклетва како 46-ти претседател на САД вчера, една недела откако Долниот дом на Конгресот гласаше за второто отповикување на Трамп, обвинувајќи го за поттикнување бунт и смртоносен напад на Капитол на 6 јануари.
Спикерот на Претставничкиот дом, Ненси Пелоси сè уште не испратила текст за отповикување до Сенатот, а според правилата на Сенатот, судењето на поранешниот претседател ќе почне ден по приемот на одлуката. Бајден претходно ги повика сенаторите да не дозволат судењето на Трамп да ги забави преостанатите активности во првите денови од неговиот мандат, како што се гласање за неговата администрација и донесување закони.