Поранешниот грен слем шампион Борис Бекер му порача на Новак Ѓоковиќ дека ќе мора да прими вакцина против коронавирус доколку сака да ја брани титулата на Австралија Опен.

Ѓоковиќ не сака да открие дали е вакциниран или не, дури ниту кога организаторот на првиот грен слем во годината официјално соопшти дека токму тоа е условот на турниртот.

– Не можам да замислам дека Новак нема да игра во Австралија. Тој толку многу го сака овој спорт, ја сака историјата на тенисот. Сака да го освои 21. грен слем трофеј во кариерата. На Австралија Опен има најголеми успеси, дури девет пати победи во Мелбург, па зошто да не победи и по десетти пат – вели Бекер кој ја разбира одлуката на Ѓоковиќ да не зборува јавно за тоа дали е вакциниран или не.

– Новак вели дека прашањето околу вакцинацијата е приватна работа и се согласувам со тој став. Но, доколку сака да учествува на турнири, тогаш мора да ги почитува правилата кои се јасни. Тоа значи дека ќе мора да вакцинира, како и сите други кои сакаат да играат во Мелбурн – додава Бекер.