Српската полиција вчера им го предаде на македонските власти Раде Трајковски – Штекли, бегалец баран со меѓународни потерници кој се бара за издржување на казна затвор за тешки телесни повреди. Неофицијално неговото име се поврзува и со убиството на младиот фудбалер Мартин Јанушев.

Екстрадицијата на Трајковски вчера беше спроведена со асистенција на Интервентната полиција, по што тој беше спроведен во Истражниот затвор во Шутка.

За убиството беше осомничен и обвинет Филип Секуловски- Кобра, кој беше уапсен по две години бегство. Кога се случи немилиот настанот, и името на 37 -годишниот Штекли неофицијално се поврзуваше со убиството, односно медиумите тогаш објавуваа дека Секуловски пред да го убие Јанушев се сретнал со Штекли.

Но, за ова официјални информации нема, ниту пак тој е обвинет за убиството кое беше извршено на 3 ноември 2017 година, кога осудениот Кобра излегол на викенд од затворот каде што издржувал казна за трговија со дрога.

Според пресудата, со која беше осуден на 9 години и четири месеци затвор, Секуловски попладнето стигнал пред зградата каде што живеел Јанушев, откако претходно го повикал „да се пресметаат”.

„Трајковски се бара по потерница на Основниот суд-Скопје 1, по член 131 став 1, во врска со член 22 од КЗ, за издржување на казна од 6 месеци”, пишува на сајтот на МВР.

Тој беше фатен во Белград на почетокот на септември минатата година, а вчера е екстрадиран во земјава.