Беа заедно во Интер, сега ќе му биде тренер на Пандев!
Како што пренесуваат италијанските медиуми, Тиаго Мота ја прифатил понудата да биде новиот тренер на Џенова, заменувајќи го Аурелио Андреацоли.
Мота во понеделникот во утринските часови се сретнал со првите луѓе и според „Скај Спорт Италија“ сите детали се „договорени“ со клубот од „Луиџи Ферарис“.
Исто така, „Тутомеркато“ информира дека во вторник (22 октомври) се очекува Џенова да го промовира Тиаго Мота како нов тренер на калчолигашот.
Мота е инаку поранешен тимски колега на македонскиот репрезентативец Горан Пандев и во сезоната 2009/10 ја освоија титулата во Лигата на шампионите.
Џенова има лош старт во Серија А, после осум кола е на претпоследната позиција (три порази во низа) со една победа и пет бода, еден повеќе од „фенерџијата“ Сампдорија.