Денеска во индустриската зона ТИРЗ Бунарџик 1 компанијата Баумер ја отвори својата фабрика во нашата земја.

Компанијата е една од водечките во изработка на сензори и сензорски решенија за автоматизација на процеси. Таа со околу 2.700 вработени и 38 сопствени центри за развој, производствени погони и продажни канцеларии во 19 земји е семејна компанија која секогаш е близу до своите клиенти.

Според најавите на менаџерскиот тим, во првата фаза на изградба на површина од околу 19.000 метри квадратни е изградена зграда со вкупна површина од 4.000 метри квадратни од кои 2.500 метри квадратни за производство и 600 метри квадратни за развоен центар и администрација.

Сопственикот на групацијата Оливер Вице истакна дека нудат вештини за висока технологија, интересни работни места и одлични услови за работа.

– Во првата фаза на изградба компанијата се фокусира на производство и производствен инженеринг. Во следната фаза на проширување се планираат тимови за развој на нови производи составени од инженери за хардвер и софтвер како и специјалисти за ИТ, информираше Вице.

По 18 месеци од кога е донесена одлуката за инвестирање во Скопје, компанијата започна со градежните работи во јули 2018 година. Производството на првиот сензор се случи во мај 2019 година.

– Ви посакувам добредојде и се надевам дека го делиме задоволството во овие утрински часови заеднички да го одбележиме започнувањето со работа на швајцарската компанија Баумер во нашата земја. Таа е една од најпознатите компании за сензори, инструменти за мерење, испитување и навигација со 38 подружници во 19 земји. Нивните високо технолошки уреди се вградуваа во автомобилската, авио-индустријата, градежништвото, како и изработка на мобилни уреди и инструменти во медицината. Со господинот Оливер Вице лани потпишавме договор за закуп на градежно земјиште со површина од 19.107м2 во ТИРЗ 1 во Бунарџик, изјави премиерот Заев на отворањето на фабриката.

Тој додаде дека по 15 месеци, конечно ја споделуваат радоста во најновата фабрика на Бауер каде веќе е започнато производството и им посака успех и реализација на планираната инвестиција од 4.7 милиони евра и 150 вработувања на раководството и на вработените.

Според вицепремиерот Анѓушев, добро е што сега се отвораат капацитети со висока технологија за разлика од порано кога во државата имало самотрудоинтензивни капацитети. Потсети дека во изминатите две години се отворени 30-тина фабрики и 54 илјади нови работни места.

– Тоа е начинот како наместо млади луѓе, да извезуваме производи, рече Анѓушев.

Од компанијата се заблагодарија на директорот на ТИРЗ Александар Младеновски, локалните консултанти, Владата на нашата држава и локалните власти кои им помогнаа во остварување на нивната цел.