Аргентинецот Лаутаро Мартинез е вистинско изненадување во досегашниот дел од сезоната, со одличните игри ги воодушеви сите и го сврте вниманието на најголемите екипи.

Младиот 22-годишен напаѓач сезонава на 18 натпревари во сите натпреварувања постигна 11 голови и имаше три асистенции.
Мартинез во Интер пристигна 2018 година од Расинг за сума од 25 милиони евра и има договор со „нероаѕурите“ до 2023 година.

Засега најголем интерес пројавува Барселона која е во потрага по наследникот на Луис Суарез. Суарез наскоро ќе наполни 33 години и за 18 месеци дефинитивно си заминува од „Камп Ноу“, но каталонците сакаат уште сега да ја обезбедат неговата замена.

Изборот падна токму на Лаутаро Мартинез за кого лобира и првата ѕвезда на екипата, Лионел Меси, а првиот конкретен чекор, управата на Барселона ќе го направи уште во зимскиот преоден рок. Доколку биде одбиена нивната понуда во која освен пари се очекува да биде вметнат и Артуро Видал или Иван Ракитиќ, тогаш на лето, Барселона планира да ја активира откупната клаузула која изнесува 111 милиони евра.

Во Интер се плашат токму поради клаузулата која е релативно мала и сакаат да му понудат нов договор на својот играч до 2024 година со што клаузулата би се зголемила на 222 милиони евра.