Барселона стана тим за потсмев, не може да купи ниту второлигашки играч
Очајната сезона во Барселона која заврши со срамен пораз од Баерн Минхен од 2:8 во Лигата на шамионите, се рефлектира и на новата оваа во која клубот сè уште не може да се извлече од хаосот кој владее во него.
„Војната“ на релација Лионел Меси – Хосеп Марија Бартомеу, надополнета со финансиската криза предизвикана од коронавирусот и која ја испразни касата на Барселона, донесе до тоа клубот да стане предмет на потсмев и да не може да купи ниту фудбалер од втората лига.
Десниот бек на Норич кој испадна од Премиер лигата, Макс Аронс, ги договори личните услови со каталонците, но англискиот тим ја одби понудата бидејќи Барселона нема пари да го реализира трансферот.
Новинарот Дејвид Орнстајн тврди дека Норич одбил не една туку две понуди на Барселона. Причината за ова е бидејќи Барселона сакала да го позајми Аронс без да се обврзе на крајот од сезоната задолжително да го откупи неговиот договор.
Норич бара обесштетување, не сака да го испрати фудбалерот на позајмица бидејќи за неговите услуги има уште два клуба кои се подготвени да платат, Тотенхем и Баерн Минхен.
Откако доби шлаканица од Норич, Барселона викендов најверојатно ќе добие уште една шлаканица и тоа од Ајакс. Имено, Бартомеу сака да му ја исполни желбата на тренерот Роналд Куман и да го ангажира дефанзивецот на Ајакс, Сержињо Дест, но повторно проблем ќе биде обесштетувањето, Ајакс бара 25 милиони евра, сума која Барселона ја нема.
Поради тоа, се очекува Дест да се пресели во редовите на европскиот шампион Баерн Минхен кој е подготвен да ја плати оваа сума, а згора на тоа веќе ги има договорено личните услови со дефанзивецот.