Барселона спасот од банкрот го бара во Холивуд?!
Бурното лето во Барселона кое резултираше со „војна“ на релација Лионел Меси – управа предводена од претседателот Хосеп Марија Бартомеу, резултираше со оставка на претседателот, но проблемите останаа на „Камп Ноу“.
Лошото раководење на управата како и пандемијата на коронавирусот ја донесоа Барселона на работ до банкрот, привремената управа мора месецов да заштеди 190 милиони евра за да не биде приморана во јануари идната година да прогласи банкрот.
Сите случувања од крајот на минатата сезона досега како што се понижувачкиот пораз од Баерн Минхен во Лигата на шампионите, одлуката на претседателот Бартомеу да најми маркетинг агенција која преку лажни профили на социјалните мрежи ќе плука со ѕвездите на екипата како Меси, Пике, Бускетс…. доаѓањето на новиот тренер Куман, потоа факсот на Меси со барање да си замине од Барселона, несогласувањата околу намалувањето на платите поради пандемијата како и заминувањето на Бартомеу, е доволно добар „материјал“ да се сними некој филм или серија и најверојатно тоа ќе се случи.
Одредени шпански медиуми пишуваат дека Барселона е блиску до договор со неименувано филмско студио од Холивуд.
Според медиумите, Барселона би добила 200 милиони евра плус можност да ја поправи сликата за себе преку филм или серија и да се спаси од банкрот.