Претседателот на Барселона, Хосеп Марија Бартомеу, само што ја реши дилемата со Лионел Меси кој одлучи да остане уште една сезона, отвори нов фронт овој пат против Луис Суарез.

Барселона, односно Бартомеу не го сака Суарез во тимот за наредната сезона и по секоја цена го тера да си замине иако има уште една година од договорот. Од друга страна, Суарез нема намера да си оди, иако не е во преден план кај новиот тренер Роналд Куман, тој се врати на тренинзите и ги исполнува своите задолженија.

Иако Јувентус му нуди нето годишна плата од 10 милиони евра, Уругваецот сака да остане во Барселона, тој нема да се откаже од последната година од договорот. Тоа на Бартомеу му го соопштија неговите адвокати иако добиваат закани од челникот на Барселона дека ќе преземе драстични мерки.

Според договорот, Луис Суарез треба да заработи 15 милиони евра нето за наредната сезона, а Бартомеу му се закани дека цела година ќе седи на трибините и нема да му биде дозволено да тренира со првиот тим.

Токму заканите го заинатија одличниот напагач и им порачал на адвокатите да се подготват за правна борба доколку Барселона не ги исполнува обврските од договорот. Тоа значи дека иако нема да биде дел од првиот тим, Барселона е должна да му обезбеди тренер, а тој мора да ги исполнува професионалните обврски кон клубот бидејќи не сака да се откаже од загарантираните 15 милиони евра.