Иако во зимскиот преоден рок управата на Барселона му се закани на Осман Дембеле дека ќе го префрли на трибините доколку не си замине од клубот, сега се обидува на сите начини да потпише нов договор.

Причина за ваквиот став на управата предводена од претседателот Жоан Лапорта е тренерот Чави Ернандез под чие водство Дембеле игра фантастично и инсистира да му се продолжи договорот на францускиот репрезентативет.

Откако Чави го наследи Роналд Куман на клупата на Барселона, Дембеле повеќе не се однесува неодговорно туку максимално професионално ги извршува задачите, а игрите му се сè подобри и беше еден од најзаслужните за убедливите победи на каталонскиот тим од 4:0 над Наполи во Лигата на Европа и над Реал Мадрид во Ла Лига.

Според „Скај Спорт“, Барселона на Дембеле ќе му понуди нов договор и се надеваат дека фудбалерот ќе го прифати истиот бидејќи е задоволен од соработката со тренерот Чави Ернандез и наводно им открил на пријателите дека сака да остане на „Камп Ноу“ и во иднина. Проблем може да претставува неговиот агент кој инсистира Дембеле да потпише со ПСЖ поради големата провизија која би ја добил.