Барселона се откажа од Нејмар: Нема ни да праќаме понуда до ПСЖ
Претседателот на Барселона, Хосеп Марија Бертомеу изјави дека ова лето нема да може да ги донесе ниту Лаутаро Мартинез ниту Нејмар.
Името на Лаутаро Мартинез од почетокот на годината се поврзува со трансфер во Барселона, но каталонскиот клуб не успеа да го реализира трансферот.
Интер беше дециден бараше 111 милиони евра колку што изнесуваше откупната клаузула за Мартинез, додека Барселона ги немаше тие пари и се обидуваше да вметне играчи во трансферот. На крајот, истече рокот кој им го даде Интер и Лаутаро Мартинез остана на „Џузепе Меаца“.
– Зборувавме изминатите недели, но преговорите се прекинати. Моментната ситуација не ни дозволува да правиме големи трансфери – изјави Бертомеу.
Барселона ова лето се поврзуваше и со трансфер на Нејмар, но повторно како и минатото лето не успеа да се договори со ПСЖ.
– ПСЖ не сака да го продаде што е нормално бидејќи Нејмар е еден од најдобрите фудбалери на светот. Минатото лето направивме се за да го вратиме на „Камп Ноу“, сега нема ни да се обидуваме. Клубот загуби речиси 200 милиони евра од почетокот на март кога почна пандемијата на коронавирусот. Мора повторно да го разгледаме планот за трошоци, мора да се прилагодуваме на актуелната состојба – додава Бертомеу.