Барселона продава речиси цел тим и се надева на заработка од околу 400 милиони евра
Каталонците мораат да направат чистка и на трансфер листата ќе бидат ставени најмалку 10 фудбалери.
Барселона веќе обезбеди три засилувања за новата сезона, Миралем Пјаниќ од Јувентус, Тринкао од Брага и младиот Педри од Лас Палмас за кои плати речиси 100 милиони евра.
Тринкао ги чинеше 31 милион евра, Педри пет милиони, а за Пјаниќ на хартија платија 60 милиони евра но од Јувентус ќе добијат 70 за Артур и „дилот“ со италијанскиот тим беше направен за да се изигра УЕФА и финансискиот фер-плеј.
Сепак, управата планира да продаде двоцифрен број на фудбалери за да го намали ростерот и сумата која ја издвојува за плати. Први на листата за отстрел се Фелипе Кутињо и Осман Дембеле кои треба да донесат највеќе пари во касата на Барселона. Иако управата ниту во сон не може да добие колку што плати, 120+105 милиони евра, но се надеваат дека ќе добијат барем 140 милиони евра.
Голманот Нето кој нема теорија да добие шанса да настапи покрај фантастичниот Тер Штеген ќе биде продаден и тоа на екипата која ќе понуди највеќе пари.
Десниот бек Муса Ваг кој се врати на „Камп Ноу“ од позајмицата во Ница не е во плановите за наредната сезона и сигурно заминува како и Тодибо и Умтити. Левиот бек Жуниор Фирпо не ги оправда очекувањата и најверојатно ќе биде дел од некоја размена.
Од играчите во средниот ред, Иван Ракитиќ и Артуро Видал си заминуваат на лето додека Артур веќе ја напушти Барселона. Во нападот покрај Кутињо и Дембеле, Барселона се надева дека ќе го продаде зимското засилување Брајтвајт за 20-тина милиони евра за да си ги врати вложените пари.
Управата се надева дека со продажбата на непожелните играчи може да заработи помеѓу 350 и 400 милиони евра. Артур веќе си замина за 75 милиони, цената за Умтити и Тодибо е 25 милиони, Муса Ваг вреди осум милиони, Фирпо околу 20 милиони, Ракитиќ и Видал помеѓу 15 и 20 милиони, Кутињо 70-80 милиони, Дембеле 60, Брајтвајт 20 и Нето околу 20 милиони евра.