Барселона не размислува за продажба на Де Јонг
Барселона одби да преговара со Манчестер сити за продажба на Френки де Јонг.
Шпанските медиуми открија дека Манчестер сити е подготвен да понуди 90 милиони евра за холандскиот репрезентативец, но ставот на Барселона е категоричен, Френки де Јонг е недопирлив.
Дел од шпанските медиуми пред извесно време започнаа да шпекулираат дека управата на Барселона планира да го продаде Де Јонг бидејќи за него може да добие највеќе пари, а прв клуб кој беше подготвен да достави официјална понуда и тоа тешка 90 милиони евра е Манчестер сити.
Но, новиот тренер на Барселона, Чави Ернандез категорично ги отфрли овие шпекулации потенцирајќи дека го гледа Де Јонг како еден од клучните фудбалери во неговиот систем на игра.
Барселона во зимскиот и летниот преоден рок идната година ќе може да заработи доволно пари со евентуалната продажба на Филипе Кутињо, Самуел Умтити, Нето и Серхи Роберто.
Прва желба на Чави е младиот напаѓач на Салцбург, Карим Адејеми, кој наводно дал согласност за негов трансфер на „Камп Ноу“.