Барселона на чекор до титулата, Меси соборува рекорди (ВИДЕО)
Шпанскиот шампион Барселона направи голем исчекор во одбрана на титулата во Ла Лига откако во дерби пресметката од 31. коло со 2:0 го совлада Атлетико Мадрид. На седум кола до крајот Барселона има 73 бодови, дури 11 повеќе од Атлетико Мадрид.
Каталонскиот тим иако доминираше во текот на целиот натпревар, а од 28. Минута играше и со играч повеќе поради исклучувањето на Диего Коста, до победата дојде со головите во самиот финиш. Прв кој ја начна мрежата на Облак беше Луис Суарез во 85 минута, а само две минути подоцна и Лионел Меси се запиша во листата на стрелци.
Со оваа победа и Меси влезе во историјата на Ла Лига, ова беше негов 335. триумф во шпанското првенство со што го надмина голманот на Реал Мадрид, Икер Касилјас. Покрај овој рекорд, ѕвездата на Барселона е сопственик и на уште два рекорда, тој за највеќе постигнати голови (415) и за највеќе асистенции (163).